تلنگانہ میں کورونا کی تیسری لہر تلسنکرات کے بعد عروج پر پہنچ جائے گی: ڈائریکٹر محکمہ صحت

حیدرآباد: یکم؍جنوری (عصرحاضر) تلنگانہ محکمہ صحت  کے ڈائرکٹر ڈاکٹر جی سرینواس راؤ نے کہا کورونا کی تیسری لہر تلنگانہ میں شروع ہوچکی ہے اور کورونا کی نئی قسم اومیکرون کا سماجی پھیلاؤ ہونے لگا ہے۔

تلنگانہ محکمہ صحت تیسری لہر سے نمٹنے کیلئے پوری طرح تیار ہے اور گزشتہ دو لہروں کے دوران جو حالات پیدا ہوئے تھے اس سے سبق حاصل کرکے تیاریوں کو مزید بہتر انداز میں مکمل کرنے کی کوشش کی جا رہی ہے۔ رات کا کرفیو یا لاک ڈاؤن کورونا وائرس کو پھیلنے سے روکنے یا اس سے نمٹنے کا حل ثابت نہیں ہوسکتے اسی لئے احتیاط ہی واحد راستہ ہے۔
ڈائرکٹر محکمہ صحت ڈاکٹر جی سرینواس راؤ نے پریس کانفرنس کے دوران کہا کہ ریاست میں کورونا کی نئی قسم اومیکرون  کے متاثرین کا سماجی پھیلاؤ شروع ہوچکا ہے اور تیسری لہر تلسنکرانت کے بعد عروج پر پہنچ جائے گی۔انہوں نے عوام سے ماسک کے استعمال  کے علاوہ سماجی فاصلہ کی برقراری  کے ساتھ کورونا سے محفوظ رہنے کی تمام احتیاطی تدابیر پر عمل آوری کو یقینی بنانے کی اپیل کی اور انتباہ دیا کہ اگر ان رہنما خطوط پر عمل آوری نہیں کیا گیا تو حالات انتہائی ابتر ہوسکتے ہیں۔ جی سرینواس نے کہا کہ کورونا وائرس کی نئی قسم اومیکرون میں کوئی علامات نہیں پائی جا رہی ہیں اسی لئے بہتر ہے کہ آئندہ 4ہفتوں کے دوران سخت احتیاط کی جائے۔ انہوں نے بتایا کہ تلنگانہ کیلئے آئندہ30یوم انتہائی اہم ہیں اور ان 30یوم میں عوام کو احتیاط کے ذریعہ ہی کورونا وائرس کی نئی قسم کو پھیلنے سے روکنا ہوگا۔
انہوں نے کہا کہ اومیکرون ڈیلٹا سے 30 گنا تیز رفتار سے پھیل رہا ہے اسی لئے اس پر قابو پانا مشکل ہے اور سخت احتیاط کے ذریعہ ہی قابو ممکن ہے۔ڈاکٹر سرینواس راؤ نے تلنگانہ میں سال نو اور تلسنکرانت تہوار کے دوران کورونا سے حفاظت کے لئے جاری رہنما خطوط پر سختی سے عمل آوری کا مشورہ دیا۔