کے ٹی آر کے ہاتھوں ونستھلی پورم میں ڈبل بیڈ روم مکانات کا افتتاح
حیدرآباد: 16؍دسمبر (عصر حاضر) میونسپل ایڈمنسٹریشن اور شہری ترقیاتی وزیر کے ٹی راما راؤ نے بدھ کے روز کہا کہ ریاستی حکومت 9714؍کروڑ کی لاگت سے ایک لاکھ ڈبل بیڈروم مکانات کی تعمیر کر رہی ہے۔
کے ٹی آر نے یہاں وستھلی پورم کے جئے بھوانی نگر میں باضابطہ طور پر 324؍مکانات کا افتتاح کرنے کے بعد کہا کہ ملک کی کوئی دوسری ریاست یا شہر میں اتنے بڑے پیمانے پر رہائش کے لیے کوئی اقدام نہیں کیا گیا جو حیدرآباد میں کیا جارہا ہے۔ ڈبل بیڈ روم مکانات کا اقدام پورے ملک کے لیے مثالی ہے۔
انہوں نے فائدہ اٹھانے والوں کو مبارکباد دیتے ہوئے اور گھروں کی صفائی ستھرائی اور دیکھ بھال کو یقینی بنانے کے لئے کہا۔ انہوں نے کہا کہ 324 مکانات 28 کروڑ روپے کی لاگت سے تعمیر ہوئے ہیں۔
حکومت نے ہر مکان کے لئے تقریبا 9 لاکھ روپے خرچ کیے ہیں جبکہ اسی یونٹ کی مارکیٹ ویلیو 40 لاکھ سے 50 لاکھ روپے تک ہوسکتی ہے۔ گھر کے مالکان کی ذمہ داری ہے کہ وہ کمیونٹی کے علاقے کو صاف ستھرا رکھیں اور گهروں کے اطراف کچرے کے انبار نہ لگائیں۔ انہوں نے کہا کہ کوویڈ 19 میں وبائی بیماری کے باوجود بھی احاطے میں صفائی ستھرائی کو یقینی بنانا ضروری ہے۔
سائٹ پر فراہم کی جانے والی سہولیات میں بارش کے پانی کی نکاسی‘ فائر سیفٹی سسٹم ، بجلی کا نظام اور لفٹ شامل ہیں۔
