باغیوں کو اُدھو ٹھاکرے کا انتباہ، الیکشن جیتنے کے لیے اپنے والد کا نام استعمال کریں میرے والد کا نہیں

ممبئی: شیوسینا کے صدر اور وزیر اعلیٰ مہاراشٹر ادھو ٹھاکرے نے ہفتہ کے روز باغیوں کی جانب سے اپنے گروپ کا نام پارٹی کے بانی آنجہانی بالاصاحب ٹھاکرے کے نام پر رکھنے کی مبینہ کوششوں پر سخت حملہ بولا۔ ادھو ٹھاکرے نے ممبئی میں شیوسینا کی قومی ایگزیکٹو میٹنگ کی صدارت کے دوران کہا، ’’الیکشن جیتنے کے لیے میرے والد کا نام نہ لیں، بلکہ اپنے والد کا نام استعمال کریں۔‘‘
ادھو ٹھاکرے کا سخت ردعمل ان غیر مصدقہ اطلاعات کے جواب میں آیا ہے، جن میں کہا گیا ہے کہ وزیر ایکناتھ سمبھاجی شندے کی قیادت میں باغیوں نے مبینہ طور پر اپنے گروپ کا نام ’شیو سینا-بالا صاحب ٹھاکرے گروپ‘ رکھنے کا فیصلہ کیا ہے۔ شیوسینا کے خلاف بغاوت کرنے والے یہ لیڈر اس وقت گوہاٹی میں ڈیرا ڈالے ہوئے ہیں۔
ادھو ٹھاکرے نے مزید کہا کہ پارٹی الیکشن کمیشن آف انڈیا (ای سی آئی) کو اس بات کو یقینی بنانے کے لیے لکھے گی کہ شیو سینا یا بالا صاحب ٹھاکرے کا نام غیر مجاز افراد یا اس طرح کے ‘ٹرن کوٹ’ (ایک پارٹی کو چھوڑ کر دوسری پارٹی میں شامل ہونے کی خواہش رکھنے والے) گروپوں کے ذریعے اپنے سیاسی مفادات کے لیے غلط استعمال نہیں کیا جانا چاہئے۔ ٹھاکرے نے خبردار کیا ہے کہ اگر وہ ایسا نہیں کرتے ہیں تو انہیں قانونی کارروائی کا سامنا کرنا پڑے گا۔
ادھو ٹھاکرنے نے گزشتہ روز پارٹی کے ضلعی سربراہوں کی میٹنگ سے خطاب کرتے ہوئے ‘شیو سینا یا بالا صاحب ٹھاکرے کا نام استعمال کیے بغیر’ الیکشن جیتنے کا چیلنج دیا تھا، جبکہ آج انہوں نے بال ٹھاکرے کے نام کے استعمال پر برہمی کا اظہار کیا۔