دیوبند،23؍ فروری(سمیر چودھری) پروموشن میں ریزرویشن کے خاتمے کے خلاف آج بھیم آرمی کے بھارت بند کا یہاں علاقہ میں قابل ذکر اثر نظر آیاہے، حالانکہ اتوار کا دن ہونے کے سبب یہاں بازار معمول کے مطابق بند تھے، اس دوران بھیم آرمی کارکنان نے دیوبند ،ناگل اور تلہیڑی بزرگ میں دھرنا دیا اور صدر جمہوریہ ہند کو ایک میمورنڈم ارسال کرکے ترقی میں ریزرویشن کی بحالی اور سی اے اے کی واپسی کا مطالبہ کیا، اس دوران بھیم آرمی کے بھارت بند کو لیکر انتظامیہ بھی مستعد رہی اور دیوبند میں کافی تعداد میں پولیس فورس تعینات رہی ہے جبکہ اعلیٰ افسران نے پولیس اور فورس کے ساتھ گشت بھی کیا ۔ بھیم آرمی کے منڈل کے صدر دیپک بدھ اور دیوبند اسمبلی کے ترجمان شوریہ امبیڈکر کی قیادت میں اتوار کی صبح کارکنان بڑی تعداد میں تلہیڑی چنگی پر واقع فلائی اوور کے نیچے جمع ہوئے ۔ اس دوران دیپک بودھ اور شوریہ امبیڈکر نے ترقی میں ریزرویشن ختم کئے جانے پر سخت برہمی کا اظہار کرتے ہوئے پرموشن کے لئے ریزرویشن بحال رکھنے کاپرزور مطالبہ کیا۔ سشیل جیسوال نے سی اے اے کو کالا قانون قرار دیتے ہوئے مطالبہ کیا کہ سی اے اے اور این پی آر کو واپس لیا جائے اور این آر سی پر بھی کبھی بھی عملدرآمد نہ کیا جائے۔اس دوران کارکنوں نے سی او چوب سنگھ کے توسط سے صدر جمہوریہ ہند کو میمورڈم میں ارسال کیا ،جس میں متعدد مطالبات کیے گئے جن میں ترقی میں ریزرویشن کو برقرار رکھنے اور سی اے اے کو واپس لینے کی مانگ کی گئی۔ اس موقع پر جتندر بودھ ، سمت کمار ، مونو ، سنجے ، پردیپ ، ہمانشو ، منو سمیت بڑی تعداد میں کارکنان موجود رہے۔ دوسری طرف بھیم آرمی کی بھارت بند کال کی وجہ سے انتظامیہ مکمل طور پر چوکس نظر آئی،تاہم اتوار کے ہفتہ واری بند ہونے کی وجہ سے سابق کے تحت پورے شہر میں دکانیںرہیں۔احتیاطی کے طور پر بازاروں کے چوراہوں پر پولیس فورس تعینات کی گئی تھی۔ اعلیٰ افسران کی قیادت میں پولیس اور آر اے ایف کے جوانوں نے سہ پہر میں شہر میں فلیگ مارچ کیا، اس دوران افسران نے لوگوں سے امن وامان بنائے رکھنے کی اپیل کی۔
ترقی میں ریزرویشن کی بحالی اور سی اے اے کو واپس لیا جائے
بھیم آرمی کے بھارت بند کے دوران دیوبند میں کارکنان نے دیا دھرنا
