سی اے اے پر سپریم کورٹ میں سماعت شروع، تین ماہ تک ملتوی کرنے کپل سبل کا مطالبہ

نئی دہلی: 22/جنوری (ذرائع) آج سپریم کورٹ میں شہریت ترمیمی قانون کے خلاف دائر کردہ 144 درخواستوں کی اہم سماعت شرو ع ہوگئی ہے۔ تاہم چیف جسٹس نے عدالت میں بڑی تعداد میں لوگوں کے جمع ہونے پر ناراضگی کا اظہار کیا ہے۔ چیف جسٹس، ایس اے بوبڈے نے کہا کہ عدالت میں ہجوم کی وجہ سے وہ کچھ سن نہیں پارہے ہیں۔یادرہے کہ شہریت ترمیمی قانون سے اب تک سپریم کورٹ میں 144 درخواستیں دائر کی گئیں۔ بیشتر درخواستیں اس قانون کی مخالفت میں ہیں ، جس میں سی اے اے کو غیر آئینی قرار دینے کا مطالبہ کیا گیا ہے۔ اس کے علاوہ این آر سی اور این پی آر کو بھی کچھ درخواستوں میں چیلنج کیا گیا ہے۔ چیف جسٹس ایس اے بوبڈے ، جسٹس عبدالنظیر، جسٹس سنجیو کھنہ کی بنچ ان درخواستوں کی سماعت کررہی ہے۔
سماعت میں اب تک کیا ہوا؟
چیف جسٹس نے کہا کہ اس وقت ہم حکومت سے عارضی شہریت دینے کا مطالبہ کیا جاسکتا ہے۔ ہم کوئی یکطرفہ فیصلہ نہیں کرسکتے ہیں۔ اٹارنی جنرل نے کہا کہ اس معاملے میں فوری حکم نام کی کوئی ضرورت نہیں ہے۔ اس پر اعتراض کرتے ہوئے سینئر وکیل وکاس سنگھ نے کہا ، ‘سی اے اے کے تحت بنگلہ دیش سے آنے والے آدھے افراد ہندو اور آدھے مسلمان ہیں۔ آسام میں 40 لاکھ بنگلہ دیشی ہیں۔ اس قانون کے تحت آدھے لوگوں کو شہریت ملے گی۔ اس سے ساری ڈیموگرافی تبدیل ہوجائے گی۔

جبکہ ، اٹارنی جنرل کے وینوگوپال کی استدعا پر ، ابھیشیک منو سنگھوی نے کہا کہ یوپی میں 40 ہزار افراد کو شہریت دینے کی بات کی جارہی ہے ، اگر ایسا ہوتا ہے تو پھر قانون واپس کیسے ہوگا۔ اسی دوران ، ایڈووکیٹ وکاس سنگھ ، اندرا جییسنگ نے عدالت میں کہا کہ آسام سے 10 سے زیادہ درخواستیں ہیں ، وہاں معاملہ بالکل مختلف ہے۔ آسام کے حوالے سے الگ حکم جاری کیا جائے۔

اٹارنی جنرل کے کے وینوگوپال نے عدالت کو بتایا کہ انہیں اب تک 144 درخواستوں میں سے 60 کی کاپی موصول ہوئی ہے۔ اس پر کپل سبل نے کہا کہ پہلے فیصلہ کیا جانا چاہئے کہ معاملہ آئینی بنچ کو بھیجنا ہے یا نہیں؟ ہم اس قانون پر پابندی کا مطالبہ نہیں کر رہے ہیں۔ اگر اس قانون پر کوئی پابندی نہیں ہے تو ہمارا مطالبہ ہے کہ سی اے اے کے عمل کو تین ماہ کے لئےملتوی کردیا جائے۔