دہلی کی شاہجہانی جامع مسجد عام مصلیوں کے لیے کھول دی گئی

نئی دہلی: 4؍جولائی (عصر حاضر) دہلی کی شاہی جامع مسجد طویل انتظار کے بعد بالآخر عام مصلیوں کے لئے کھول دی گئی ہے۔ صبح 9 بجے سے رات 10 بجے تک عام لوگوں کو مسجد کے اندر داخل ہونے کی اجازت رہے گی۔ اب مسلمان مسجد کے اندرون حصے میں عبادت کر سکیں گے۔ مسجد کھولنے سے متعلق کچھ ضوابط بنائے گئے ہیں، اس پر سختی سے عمل کرنا لازم رہےگا۔ عام لوگ ظہر، عصر، مغرب اور عشاءکی نماز ہی جامع مسجد میں ادا کر سکیں گے۔ فجر کی نماز مسجد کے اندر کے افراد ہی ادا کریں گے۔

دراصل حکومت کی گائڈ لائن کے مطابق 10 بجے رات سے لاک ڈاون کا وقت شروع ہوجاتا ہے، اس لئے فجر میں وہی لوگ باجماعت نماز ادا کرسکیں گے، جو مسجد کے اندر ہیں۔ کورونا وائرس پھیلنے کے سبب ایک نمازی سے دوسرے نمازی کے درمیان سماجی فاصلہ (سوشل ڈیسٹنسنگ) بنائے رکھنا ضروری ہے۔ ساتھ ہی نماز ادا کرنے کے لئے جائے نماز ساتھ لے کر آنا اور گھر سے وضو کرکے آنا ہوگا۔ جامع مسجد میں وضو کےلئے بنائے گئے حوض کے پانی کو پہلے ہی خشک کر دیا گیا ہے جبکہ جامع مسجد کی صرف اندرونی حصے میں ہی نماز ادا کی جائے گی، سماجی دوری بنائے رکھنے کے لئے نشانات لگا دیئے گئے ہیں۔ اندرونی حصہ میں نماز اور سماجی دوری کو دیکھتے ہوئے کافی کم تعداد میں ہیں لوگ نماز ادا کر پائیں گے۔