رمضان کے مبارک مہینے میں آپ نے غریبوں کو بے گھر کردیا ہم اس کی مذمت کرتے ہیں

احمدآباد: 14؍اپریل (عصرحاضر) گجرات اسمبلی انتخابات کو ابھی کافی وقت ہے، تاہم سیاسی پارٹیاں ابھی سے انتخابی تیاروں میں مصروف ہیں۔ یکے بعد دیگر پارٹیوں کے سینیئر رہنما گجرات کے دورے کر رہے ہیں اور عوام کو لبھانے کی ہر ممکن کوشش میں مصروف ہیں۔ اسی ضمن میں مجلس اتحادالمسلمین کے سربراہ اسد الدین اویسی بھی گجرات کے دورے پر ہیں جہاں وہ اسمبلی انتخابات کی تیاریوں کا جائزہ لے رہے ہیں اور ذمہ داران سے ملاقات کر رہے ہیں۔
اس موقع پر ای ٹی وی بھارت کے ساتھ بات چیت کرتے ہوئے مجلس اتحاد المسلمین کے سربراہ اسد الدین اویسی نے ریاستی حکومت کو تنقید کا نشانہ بنایا ۔ جب ان سے پوچھا گیا کہ’ گجرات بی جے پی کا گڑھ ہے، وہاں وہ عوام کو لبھانے میں کیسے کامیاب ہوں گے۔ انہوں نے کہا کہ ‘کسی پارٹی کا کوئی گڑھ نہیں ہوتا ہے، یہ کانگریس کی نا اہلی ہے کہ 27 برسوں سے بی جے پی ریاست کے اقتدار میں قابض ہے۔ ہم یہاں لیڈرشپ تیار کرنے کے لیے آئے ہیں اور گجرات کے مسلمانوں کی آواز کو اسمبلی تک پہنچانے کے لیے آئے ہیں۔ انہوں نے کہا کہ رمضان کے بعد بھی وہ آئندہ مہینوں میں گجرات کا دورہ کریں گے اور یہاں کے لوگوں سے ملاقات کریں گے۔’انہوں نے کہا کہ میونسپل کارپوریشن انتخابات میں عوام نے مجلس کو اپنی محبت سے نوازا ہے اور ہماری پارٹی کے کاؤنسل منتخب ہوئے اور اسمبلی میں بھی پر امید ہیں۔ ہم اور پوری تیاری کے ساتھ اسمبلی انتخابات میں جا رہے ہیں۔ امید ہے کہ گجرات اسمبلی انتخابات میں ہمارے امیدوار کو کامیابی ملے گی اور لوگ ووٹ ہمیں دیں گے۔’
انہوں نے مزید کہا کہ ‘رام نومی کے دن ہوئے تشدد کی ہم مذمت کرتے ہیں اور تشدد کی مذمت کرنی چاہیے۔ رام نومی کے دن جو تشدد ہوا، اس کے لیے گجرات حکومت سمیت دیگر ریاستی حکومتیں ذمہ دار ہیں۔ آئی بی کے ان پٹ تھے تو آپ نے اس پر قبل از وقت ایکشن کیوں نہیں لیا۔ آپ کی وجہ سے ہی تشدد ہوا اور تشدد کے بعد وہی پرانی کہانی کہ مسلمانوں نے یہ کیا، اپنی غلطیوں کو دیکھو، اپنے گریبان میں جھانک کر دیکھو، جلوس کو پر امن رکھنا سرکار کی ذمہ داری ہے۔ مدھیہ پردیش میں آپ لوگوں کے گھروں کو منہدم کررہے ہیں، رمضان کے مبارک مہینے میں آپ نے غریبوں کو بے گھر کردیا ہم اس کی مذمت کرتے ہیں۔’