بیڑ: 18/ نومبر (پریس ریلیز) علاقہ مراٹھواڑہ کے ضلع بیڑ میں رکن اسمبلی عالیجناب سندیپ شرساگرکے ہاتھوں گزشتہ کل جمعیۃ علماء الفیض کلینک کا شاندار افتتاح عمل میں آیا۔ اس افتتاحی تقریب سے خطاب کرتے ہوئے جناب سندیپ شرساگر نے لاک ڈاؤن اور دیگر مواقع پرجمعیۃ علماء کی جانب سے کی جانے والی خدمات کی ستائش کی۔ انہوں نے جمعیۃعلماء کے ذریعہ قومی یکجہتی کے پروگرام کے انعقاد اور جمعیۃعلماء کے راشٹریہ ادھیکش کی کوشش و کاوشوں کو سراہتے ہوئے کہا کہ ہمارے ملک کی گنگا جمنی تہذیب کو مضبوط کرنا اور اس کے بقاء کی کوشش کرنا بہت اہم کام ہے جو اس وقت جمعیۃعلماء اور اس کے ذمہ داران کر رہے ہیں۔ سندیپ شر ساگر نے جمعیۃ علماء الفیض کلینک کے افتتاح پر اپنی مسرت کا اظہار کرتے ہوئے اس بات کا یقین دلایا کہ ہم جمعیۃعلماء کی ہر آواز پر پہلے بھی کھڑے تھے اور آج بھی ہم کھڑے ہیں۔اور آپ آئندہ بھی جب کبھی آواز دیں گے ہم جمعیۃ کی آواز پر کھڑے رہینگے۔ اس موقع پر خطاب کرتے ہوئے جمعیۃعلماء مہاراشٹر کے نائب صدر حافظ محمد ذاکر صدیقی نے کہا کہ جمعیۃ علماء سیاسی جماعت نہیں ہے،لیکن سیاست سے چشم پوش بھی نہیں ہے۔جمعیۃعلماء سیاست کا استعمال کبھی نہیں کرتی،لیکن وہ اپنی دینی شناخت اور اسلامی تہذیب و تمدن کی بقاء کے لئے لڑائی لڑنے کا کام کرتی ہے۔خدمت خلق بھی جمعیۃعلماء کے مقاصد میں سے ہے۔ مفتی عتیق الرحمٰن قاسمی جنرل سکریٹری ضلع بیڑ نے جمعیۃعلماء کی مختصراًعوامی خدمات پیش کرتے ہوئے کہا کہ جمعیۃ علماء ضلع بیڑ کا الفیض کلینک شروع کرنا یہ عوامی خدمت کی ایک کڑی ہے۔ اس سے قبل جبکہ عالمی وباء کی وجہ سے پورے ملک میں حکومت کی طرف سے لاک ڈاؤن نافذ کردیا گیا تھا۔جس کی وجہ سے لوگ طرح طرح کے حالات سے دو چار،مختلف پریشانیوں سے جوجھ رہے تھے،ایسے نازک وقت میں جمعیۃعلماء ضلع بیڑنے اپنے موجودہ وسائل کے ساتھ میدان میں آئی،اور ضرورتمندوں کی مدد کرتے ہوئے14/لاکھ سے متجاوز مالیت کے اناج وغیرہ تقسیم کئے۔ لوگوں کی بگڑتی صحت کے پیش نظر جمعیۃعلماء کے ضلع کے مختلف مقامات پر درجنوں مفت طبی کیمپ کا انعقاد کیا۔جس سے کم و بیش 27/ہزار لوگوں نے استفادہ کیا۔ اور ابھی یہ سلسلہ جاری ہے۔ شرکاء افتتاح میں بطور خاص عالی جناب معین ماسٹر،فاروق پٹیل،مولانا شیخ زاہد ندوی استاد جامعہ اشاعت العلوم اکل کوا،علاقہ کے نگر سیوک باڑا صاحب گنجاڑ،منا انعامدار،علیم پٹیل،سلیم اشرفی،حافظ جنید،مزمل پٹیل و دیگر حضرات کثیر تعداد میں شریک تھے۔ اخیر میں صدر مجلس حافظ محمد ذاکر صدیقی نائب صدر جمعیۃ علماء مہاراشٹر کے شکریہ اوردعا پر مجلس کا اختتام عمل میں آیا۔
