وبائی مرض کو مذہبی منافرت کے لیے استعمال کرنا قابلِ مذمت

دیوبند: 4؍اپریل (پریس ریلیز) دارالعلوم دیوبند کے مہتمم مفتی ابوالقاسم نعمانی نے کہا کہ کورونا وائرس اس وقت ایک عالمی مسئلہ بنا ہوا ہے‘ دنیا کے بہت سے ممالک اس کی زد میں ہیں‘ ہندوستان میں بھی یہ وبائی مرض بیرونِ ممالک سے آگیا ہے‘ اس لیے اپنے اور اپنے معاشرہ کے تحفظ کے لیے احتیاطی تدابیر اختیار کرنا ہر لحاظ سے ضروری ہے؛ لہذا ہندوستانی عوام سے اپیل ہے کہ طبی معائنہ کرانے میں سرکاری عملے کے ساتھ مزاحمت کے بجائے تعاون کا معاملہ کریں۔ اور تبلیغی جماعت سے وابستہ اُن افراد سے بھی اپیل کی جاتی ہے جو یکم مارچ کے بعد مرکز جاکر آئے ہوں‘ اب وہ کہیں بھی ہوں‘ رضاکارانہ طور پر خود آگے آئیں اور مقامی انتظامیہ سے رابطہ کرکے کورونا وائرس سے متعلق اپنا طبی معائنہ کرائیں‘ بیباکی اور ذمہ داری سے کام لیں‘ حالات کا مقابلہ کریںع اس طرح کئی قسم کے اندیشوں کا سدباب کیا جاسکتا ہے۔

تبلیغی جماعت کے مرکز حضرت نظام الدینؒ کے جو احوال ابھی تک سامنے آئے ہیں وہ ہر اعتبار سے فکر و تشویش کا باعث ہیں‘ ایسی سخت اور آزمائش کی گھڑی میں جب کہ پوری دنیا کورونا وائرس سے پیدا شدہ وبائی مرض کا مقابلہ کررہی ہے‘ ہمارے ملک کے چند پراگندہ ذہن عناصر اس میں بھی مذہبی منافرت کا زہر گھول رہے ہیں ہم ایسے عناصر کی سخت الفاظ میں مذمت کرتے ہیں اور حکومت ہند سے مطالبہ کرتے ہیں کہ اس سلسلہ میں حقیقت پسندی سے کام لیتے ہوئے اور سنجیدہ جد و جہد کے ساتھ ایسے عناصر (بالخصوص میڈیا) پر قدغن لگائے جو ماحول کو خراب کرنے پر لگے ہوئے ہیں مزید یہ کہ وہ ملک اور بیرون کے افراد جو کورونا وائرس کی زد میں آگئے ہیں‘ ان پر قانونی شکنجہ کسنے کے بجائے انسانی رشتوں کا فرض نبھاتے ہوئے ان کے علاج اور راحت رسانی کے مؤثر اقدام کرے۔