مدینہ منورہ: 7؍مارچ (العربیۃ السعودیۃ) کرونا وائرس کے خطرات سے نمٹنے کے لیے سعودی حکومت مسلسل کوشاں ہیں بالخصوص حرمین شریفین کے امور کی جنرل پریذیڈنسی نے مسجد نبوی شریف میں حفاظتی اور احتیاطی اقدامات کی سطح کو مزید بلند کر دیا ہے۔ اس سلسلے میں مسجد نبوی کے اندر جراثیم کش مواد کے ساتھ صفائی کا عمل بڑھا دیا گیا ہے۔ اس کام میں جدید ترین آلات اور مشینوں کا استعمال کیا جا رہا ہے۔ مسجد نبوی میں پانی کے کولروں ، گلاسوں اور قالینوں کو دن بھر میں دس مرتبہ صاف کیا جا رہا ہے۔ اسی طرح نماز کے لیے بچھے قالینوں کی صفوں کے درمیان 1.5 میٹر کا فاصلہ کر دیا گیا ہے تا کہ امراض کے پھیلاؤ پر روک لگائی جا سکے۔
من داخل #الروضة_الشريفة بالمسجد النبوي في المدينة المنورة.. مراسل العربية @BinMusaad يتابع الإجراءات التي اتخذت لحماية المصلين والزائرين من فيروس #كورونا pic.twitter.com/MyD4HTsxA9
— العربية السعودية (@AlArabiya_KSA) March 7, 2020
اس سلسلے میں العربیہ کے نمائندے نے مسجد نبوی میں صحت، ماحول اور تجربہ گاہوں کے امور سے متعلق ڈائریکٹر یوسف العوفی سے خصوصی بات چیت کی۔ العوفی نے بتایا کہ وزارت صحت کے ڈائریکٹر جنرل کی ہدایت پر کرونا وائرس سے بچاؤ کے لیے مسجد نبوی میں حفاظتی اور احتیاطی اقدامات اور تدبیروں میں اضافہ کر دیا گیا ہے۔ ان میں مسجد نبوی کے فرش کو جراثیم کش اور خوشبو دار مواد کے ذریعے روزانہ چھ مرتبہ دھونا، توسیع کے علاقوں میں داخلی راستوں پر جراثیم کش مواد کا چھڑکاؤ، نمازیوں کی صفوں کے قالینوں کے درمیان فاصلہ پیدا کرنا اور مسجد کے اندر ایئر کنڈیشنر کی جالیوں اور روشن دانوں کی خصوصی صفائی شامل ہے۔
حرمین شریفین کے امور کی جنرل پریذیڈنسی نے مسجد حرام اور مسجد نبوی کو جراثیم سے پاک رکھنے اور ان کی تطہیر کے لیے 3500 اہل کار مامور کیے ہیں۔ واضح رہے کہ روضہ مبارک کو بقیہ مسجد سے علاحدہ کرنے والے برآمدوں میں نماز کی ادائیگی پر عارضی پابندی لگا دی گئی ہے۔ یہ برآمدے مسجد نبوی کی پرانی تعمیر کا حصہ ہیں۔ اس تعمیر کا مجموعی رقبہ 16 ہزار مربع میٹر ہے۔ پانچوں نمازوں کے وقت مسجد نبوی کے امام کا داخلہ اور جنازے کی موجودگی مذکورہ پابندی سے مستثنی ہے۔
