دنیا کی سب سے بڑی کووڈ -19 ٹیکہ کاری مہم کے پہلے مرحلہ کا وزیر اعظم مودی نے کیا آغاز

Asrehazir

جنوری 16, 2021

نئی دہلی: 16؍جنوری (عصرحاضر) وزیر اعظم نریندر مودی نے ویڈیو کانفرنس کے ذریعہ ملک میں دنیا کی سب سے بڑی کووڈ ۔19 ٹیکہ کاری مہم کا آغاز کر دیا ہے۔ اس ویڈیو کانفرنس میں تمام ریاستوں اور مرکز کے زیر انتظام علاقوں کے 3006 ٹیکہ کاری مراکز نے شرکت کی۔

ٹیکہ کاری مہم کا آغاز کرتے ہوئے وزیر اعظم مودی نے اس پر اہم معلومات فراہم کی۔ ٹیکہ کاری کے پہلے روز ہر سنٹر میں تقریباً 100 افراد کو ٹیکے لگائے جائیں گے۔ ہیلتھ ورکر جیسے گروپوں کو پہلے ترجیح دی جارہی ہے۔ سرکاری اور نجی شعبے میں ’انٹی گریٹڈ چائلڈ ڈویلپمنٹ اسکیم‘ کے تحت کام کرنے والے ہیلتھ ورکرز (آنگن واڑی ورکرز) کو پہلے مرحلے میں ٹیکے لگائے جائیں گے۔

وزیر اعظم مودی نے کہا کہ ویکسین تیار کرنے میں سائنسداوں نے کڑی محنت کی ہے۔ ’’اس دن کا بے صبری سے انتظار ہو رہا تھا۔ کورونا کی ویکسین آ گئی ہے۔ ویکسین بنانے والوں نے کڑی محنت کی ہے۔ انہوں نے نہ تہوار کی فکر کی اور نہ چھٹی منانے گھر گئے۔‘‘ انہوں نے کہا کہ ایسے دن کے لئے ہی قومی شاعر رام دھانی سنگھ دنکر نے کہا تھا،

’جب ماناو (انسان) زور لگاتا ہے،

پتھر پانی بن جاتا ہے

وزیر اعظم نریندر مودی نے کہا، ’’عموماً ویکسین تیار کرنے میں برسوں لگ جاتے ہیں لیکن ایک نہیں بلکہ دو ’میڈ ان انڈیا‘ ویکسین بہت ہی کم وقت میں تیار ہو گئیں۔ فی الحال دیگر ویکسین کو تیار کرنے میں بھی تیزی سے کام کیا جا رہا ہے۔

وزیر اعظم مودی نے ملک کے باشندگان سے خطاب کرتے ہوئے کہا کہ ’’ٹیکہ کاری مہم کے پہلے مرحلہ میں تین کروڑ لوگوں کو ٹیکہ لگایا جائے گا۔ دوسرے مرحلہ میں ہمیں اس تعداد کو 30 کروڑ تک لے جانا ہے۔ جو بزرگ ہیں، جو مہلک بیماری میں مبتلا ہیں، انہیں اس مرحلہ میں ٹیکہ لگے گا۔ آپ تصور کر سکتے ہیں، 30 کروڑ سے زیادہ آبادی کے دنیا میں صرف تین ہی ملک ہیں، خود ہندوستان، چین اور امریکہ۔ تاریخ میں اتنے بڑے پیمانے پر ٹیکہ کاری مہم پہلے کبھی نہیں چلائی گئی۔

وزیر اعظم مودی نے کہا کہ ’’ہر ہندوستانی کو اس بات پر فخر ہوگا کہ دنیا بھر کے تقریباً 60 فیصد بچوں جو زندگی کی حفاظت کے لئے ٹیکے لگتے ہیں وہ ہندوستان میں ہی تیار ہوتے ہیں۔ کورونا کے خلاف جنگ کے دوران ہندوستان نے خود اعتماد اور خود انحصار کو حاصل کیا۔ ہندوستان کے ویکسین سائنسدان، ہمارا نظام طب دنیا بھر کے لئے معتمد ہے۔ ہم نے یہ اعتماد اپنے ٹریک ریکارڈ سے حاصل کیا ہے۔‘‘

انہوں نے کہا کہ ’’ہمارے سائنسدان اور ماہرین جب دونوں میڈ ان انڈیا ویکسین کی سلامتی اور اثرات کے حوالہ سے پر اعتماد ہوئے تبھی انہوں نے اس کے ایمرجنسی استعمال کی اجازت فراہم کی۔ اس لئے ملک کے باشندگان کو کسی بھی پروپگینڈا یا منفی تشہیر سے بچ کر رہنا ہے۔ ہم دوسروں کے کام آئیں، یہ بے لوس جذبہ ہمارے اندر رہنا چاہیے۔ قوم صرف مٹی، پانی، کنکر پتھر سے نہیں بنتی، بلکہ قوم کا مطلب ہوتا ہے لوگ۔ بحران کتنا بھی بڑا کیوں نہ ہو، ملک کے باشندگان کا خود اعتماد کبھی ختم نہیں ہوا۔‘‘