حضرت خواجہ معین الدین چشتی ؒ کی شان میں کی گئی گستاخی پر ٹی وی چینل کے اینکر کی گرفتاری کا مطالبہ

حیدرآباد: 17؍جون (پریس ریلیز) حضرت خواجہ معین الدین چشتی اجمیریؒ کی شان میں ٹی وی چینل ”نیوز 18“ کے اینکر نے نا زیبا اور ہتک آمیز رویہ کو اختیار کر تے ہوئے قابل گرفت الفاظ ادا کیے ہیں۔مولانا حامد محمد خان صاحب امیر حلقہ جماعت اسلامی ہند نے اخبارات کے لئے جاری اپنے مذمتی بیان کہا کہ نیوز اینکر نے حضرت معین الدین چشتی اجمیریؒ کی شان میں گستا خی کا مجرمانہ کردار ادا کیا ہے اور نہ صرف مسلمانوں کے جذبات کو ٹھیس پہنچائی ہے بلکہ فرقہ وارانہ ہم آہنگی کی فضاء کو بھی مکدر کیا ہے۔آپ نے کہا کہ حضرت اجمیریؒ بر صغیر ہند و پاک میں اسلامی تعلیمات اور انسانی اقدارکے عظیم داعی اور غیر متنازعہ روحانی پیشوا رہے ہیں۔ حضرت اجمیریؒ کسی تعریف کے محتاج نہیں ہیں ان کی اپنی ایک منفرد پہچان ہے اور ساری عالم انسانیت ان کی خدمات سے عقیدت و محبت رکھتی ہے۔ مولانا حامد محمد خان صاحب نے کہا کہ ایسا محسوس ہو تا ہے کہ اس واقعہ کو منصوبہ بندی کے ساتھ جان بوجھ کر انجام دیا گیا اور فرقہ پرستی کو بڑھاوا دینے کی مذموم کوشش کی گئی۔ مولانا نے کہا کہ جہاں ایک طرف گودی میڈیا کی جانب سے دینی مدارس اور مسلمانوں کو نشانہ بنایا جارہا ہے وہیں دوسری طرف ہر کچھ دن بعد ٹی وی چینلوں پر Debate کے نام پر مسلمانوں کے مذہبی جذبات کو ٹھیس پہنچائی جارہی ہے۔  آپ نے مرکزی حکومت‘ عدلیہ اور انتظامیہ سے مطالبہ کیا کہ فی الفور اس واقعہ کا سخت نوٹ لیاجائے اور چینل اور اینکر کے خلاف سخت قانونی کاروائی کرتے ہوئے انصاف کیا جائے تا کہ مستقبل میں اس طرح کے واقعات کا اعادہ نہ ہو۔