جماعت اسلامی ہند گریٹر حیدرآباد کی جانب سے لاک ڈاؤن کے بعد ڈیڑھ کروڑ روپیوں سے زائد کا ریلیف ورک

حیدرآباد: 19؍اپریل (عصر حاضر) کورونا وائرس کی وباء سے نمٹنے ملک اور ریاست میں لاک ڈاؤن کے بعد سے اب تک جماعت اسلامی ہند گریٹر حیدرآباد کی جانب سے کئے گئے فلاحی کاموں کی رپورٹ پیش کرتے ہوئے ناظم شہر جماعت اسلامی ہند گریٹر حیدرآباد،مولانا حافظ محمد رشاد الدین نے اپنے جاری کئے گئے صحافتی بیان میں کہا کہ جماعت اسلامی ہند گریٹر حیدرآبادنے لاک ڈاؤن کے آغاز کے ساتھ ہی ریلیف کے کاموں کا منصوبہ بنایا اور الحمدللہ بڑے منظم انداز میں کاموں کا سلسلہ جاری ہے۔شہر حیدرآباد میں جماعت کی بائیس مقامی یونٹس اور چھ سرکلس(حلقہ کارکنان) ہیں۔ان تمام علاقوں میں سروئے کے بعدریلیف کا کام جاری ہے۔اسکے علاوہ جن علاقوں میں جماعت کی شاخیں موجود نہیں ہیں وہاں بھی امداد کی مطالبات کے پیش نظر کوشش جاری ہے۔چونکہ شہر میں دیگر ریاستوں کے ملازمین کی بھی بڑی تعداد موجود ہے جولاک ڈاؤن کی وجہہ سے یہاں پھنسے ہوئے ہیں،ان تک بھی امداد رسانی کا کام کیا گیا۔ناظم شہر جماعت اسلامی ہند گریٹر حیدرآباد،مولانا حافظ محمد رشاد الدین نے کہا کہ لاک ڈاؤن سے اب تک صاحب ثروت اور خیرخواہوں کے تعاون سے جماعت اسلامی ہند گریٹر حیدرآباد کی جانب سے ڈیڑھ کروڑ روپیوں سے زائد کا ریلیف ورک انجام دیا گیا ہے۔لاک ڈاؤن کے دوسرے مرحلہ میں مستحق افراد کی شناخت کے ساتھ ان تک ضروریات کی اشیاء،دوائیں،غذائی اجناس کے علاوہ پکا ہواکھانا بھی پہنچایا گیا۔سولہ ہزار سے زائد راشن کٹس اب تک تقسیم کئے جاچکے ہیں۔ناظم شہر نے کہا کہ جماعت کی ذیلی تنظٰمیں،ایس آئی او،جی آئی او،ایم پی جے،ڈیر،اور سوشیل ونگ سے وابستہ افراد بھی شب و روز خدمت خلق کے کاموں میں مصروف ہیں۔اور سماجی فاصلہ کی پابندی اور دیگر ضروری احتیاطی تدابیر پر مکمل عمل کرتے ہوئے یہ کام انجام دے رہے ہیں۔حافظ رشاد الدین نے کہا کہ جماعت اسلامی ہندکی جانب سے تمام فلاحی کام بلالحاظ مذہب وملت کئے جارہے ہیں اور برادران وطن میں بھی اسکا اچھا اور مثبت پیغام جارہا ہے۔انہوں کہا کہ اب جبکہ رمضان المبارک بالکل قریب ہے۔لہذا جماعت نے منظم انداز میں وسیع پیمانے پر قبل ازرمضان اور رمضان میں بھی مسلم مستحق خاندانوں میں سحر و افطار کی ضروریات کو پورا کرنے کا منصوبہ بنایا ہے۔ جیلوں (چیرلہ پلی،چنچلگوڑہ اور بچوں کی جیل) میں بھی سالہائے گذشتہ کی طرح افطار کا نظم کیاجائے گا۔اسکے علاوہ حسب ضرورت مستحق غیر مسلم برادران وطن میں بھی راشن کٹس کی تقسیم کا سلسلہ جاری رہے گا۔حافظ رشاد الدین نے اس موقع پر حکومت اور انتظامیہ کا بھی شکریہ ادا کیا کہ ان فلاحی کاموں کے کرنے میں ان کا بھی تعاون بھی رہا ہے۔ساتھ ہی تمام خیر خواہوں کے حق میں بھی اللہ تعالی سے دعا کی کہ ان کو دنیا اور آخرت میں بہترین اجر سے نوازے۔اور صاحب خیر و ثروت حضرات و خواتین سے اپیل کی کہ مصیبت کی اس گھڑی میں مستقبل میں بھی وہ دامے درمے سخنے  دل کھول کر خیر کے کاموں میں تعاون فرمائیں۔آخر میں ناظم شہر نے حیدرآباد کی عوام خصوصاً مسلم نوجوانوں سے اپیل کی کہ وہ لاک ڈاؤن کی پاسداری کرتے ہوئے انتطامیہ کا تعاون کریں،بلاضرورت گھروں سے باہر نہ نکلیں،اسطرح اپنی اور اپنے گھر والوں کی حفاظت کریں اسی میں سب کی بھلائی ہے۔رمضان میں اوقات کا صحیح استعمال کریں،کثرت سے دعا،درود  و  اذکار کا اہتمام کریں،قرآن مجید کا زیادسے زیادہ مطالعہ کریں۔سیرت النبی ﷺ ؑوسیرت صحابہؓکے واقعات کو پڑھیں۔رشتہ داروں،پڑوس کے علاوہ غرباء ومستحقین کا خیال رکھیں۔اور خصوصاً اس مہلک وباء کے خاتمہ کیلئے بارگاہ الہی میں دعائیں کریں۔اللہ تعالی تمام انسانوں پر رحم فرمائے۔مزید تفصیلات و تعاون کے لئے  فون نمبر 9293602628 پر ربط کیا جاسکتاہے۔