نئی دہلی: 23؍فروری (ذرائع) شہریت ترمیمی قانون اور این آر سی کے خلاف دہلی کے موج پور علاقہ میں اتوار کو کشیدگی پیدا ہوگئی ۔ دراصل سی اے اے کی مخالفت میں احتجاج اور سی اے اے کی حمایت میں احتجاج کرنے والے لوگ آمنے سامنے آگئے ۔ دیکھتے ہی دیکھتے دونوں جانب سے پتھراو شروع ہوگیا ، جس کے بعد وہاں افرا تفری مچ گئی ۔ اطلاعات کے مطابق وہاں موجود پولیس اہلکاروں نے حالات پر قابو پانے اور بھیڑ کو منتشر کرنے کیلئے آنسو گیس کے گولے داغے اور لاٹھی چارج کیا ۔ وہیں موج پور میں حالات میں کشیدگی کے باعث دہلی میٹرو نے موج پور- بابر پور میٹرو اسٹیشن کو بند کردیا ہے ۔ نیوز ایجنسی اے این آئی کی تصویروں میں سڑک پر اینٹ اور پتھر کے ٹکڑے بھی نظر آئے۔ پولیس نے لوگوں کو سمجھانے کی بھی کوشش کی ، تاہم بعد میں حالات خراب ہوتا دیکھ کر آنسو گیس کے گولے چھوڑے ۔ علاقہ میں حالات ہنوز کشیدہ ہے ۔ ادھر جعفرآباد میٹرو اسٹیشن کے پاس بھی خواتین سی اے اے کے خلاف مظاہرہ کررہی ہیں ۔ مظاہرین کا کہنا ہے کہ جب تک مرکزی حکومت قانون واپس نہیں لے گی وہ سڑک سے نہیں ہٹیں گی ۔ جعفر آباد میں کثیر تعداد میں پولیس اہلکاروں کو تعینات کیا گیا ہے ۔
دہلی کے مختلف مقامات پر زبردست احتجاجی مظاہرے‘ سیاہ قوانین کے مخالفین اور حمایتی آمنے سامنے
موج پور میں مظاہرین پر پولیس نے داغے آنسو گیس کے گولے، جعفرآباد میں بھی احتجاج جاری
